2Cor 9 | KYG | STEP | Lapakaemo Yuta kotega mai'naya apaote vaya'aina hapa maesaya ofalini monie'mo avo'mo kaesuva ali'ya'nimo ohane'niye.

2 Corinthians 9

1 Lapakaemo Yuta kotega mai'naya apaote vaya'aina hapa maesaya ofalini monie'mo avo'mo kaesuva ali'ya'nimo ohane'niye. 2 Nagaemo ago afi'novana afa'a apamigune, hutapa hu'naya gemo Masetoniya kotega siosi'ale siosi'ale'mo mai'naya vaya'ai apaulagale'mo lapakitapile'mo ali'na asaga hu'na nelapate'nae'mo, Akaiya kotega siosi'ale siosi'ale'mo mai'naya vaya'mogimo afe kafugamo ago alo hu'a mai'nae, hu'na hapa pai'nove. Asole vaya'mogimo lapayamukiki nehaya kavafe'mo lapava gemo afite'apae'mo he ti'a ani kava'mo hu'a ali'ya'mo ali'nae. 3 Ani gemo huva'monanafa lapakitapile'mo alita asaga huta nelapatetae'mo, ago alo hu'a mai'nae, huta hapa pai'nona gemo aigofe gemo ohane'nisigetapa alo hisayafe'mo mani konagatimogimo ali'na apate'noge'a lapakaetegamo u'nae. 4 Fiku yanage'a Masetoniya vaya'mogi nagae'e'mo lokae'a u'a lapakete'apae'mo, alo hu'a o'mai'nae, hu'a hisageno'ae'mo lavagage hugiye. He, lavagage hisigeno'ae'mo lapakae'e'mo lapavagage hugiye. 5 Hugiya'mofe'mo nagesamo afi'nae'mo kanalenage'na konagatimogife'mo hapa paisuge'a hogote'a lapakaetegamo ugae. Ute'apae'mo apamigune, hutapa hu'naya ofalini monimo alo hutapa maigae. Hiyo, huta osugunanagi lapakaitapimo lapau'ninagetapa hugae.

6 Ina gemo hu'nae'mo, aise avina ya'mo nehakalaya vaya'mogimo aise ne'ya'mo aligae. Asole avina ya'mo nehakalaya vaya'mogimo asole ne'ya'mo aligae, hu'na lapa nepauve. 7 Aligaya'mofe'mo muki'amogitapamo lapamete lapamete hutapa lapaipafi'mo lapakesamo ne'afitapae'mo, ani agufa ofalini monimo malegaune, hutetapa ani kava hutapa hiyo. Fiku yanageno lapaipamo'mo kana hu'ninagetapa huge lagae'e mago vaya'mogi'e'mo lokiya gemo hisunagetapa huge hutapa hugayanagi lapamogaga ai'netapaeke'mo hiyo. Goti'a apamogaga ai'ne'a ne'malaya vaya'aife'mo hau ayamopafi'mo hau'niya'mofe'mae. 8 Goti'a mago'e huno fiku lapa maeno lapamisigeno muki afina'mo muki yatapimo mago'e huno havai te'nisigetapa muki alagepa ali'ya'mo afa'a aligae. 9 Ani kavafe'mo Goti mukufi'mo avo'mo kae male'niya gemo'a huno'ae'mo,

Ani fatago vekamo'a kagemi ya'amo alino fako huno kagemi ya'apimo ohane'niya vaya'aina apami'niye. Fatago kava'amo'mo muki afina'mo hanege hanege huno hanegaiye,
huno hu male'niye. 10 Avina ya'mo nehakalaya vaya'mo avina ya'mo hakalesayafe'mo alino apamige ne'ya'mo ne'naya vaya'mo ne'ya'mo nesayafe'mo alino apamige huno alino ne'apamiya vekamo'a avina ya'mo alino lapamisigetapa hakalesaya avina yafe'mo hago, huno hisigeno hagesigetapa fatago kavatapileti'mo mago'e mago'e hutapa aligae. 11 Goti'a afa'a alitapa apamisageno'ae'mo mago'e huno lapamisigetapa hisaya ofalini monimo alinituta apamisuna kavatileti'mo Gotife'mo hao ke hegae. 12 Ani ali'ya'mo alitetapae'mo apaote vaya'mo kafu hu'naya vaya'aina hapa maesaya kava'age'mo afole o'aigifa havai teteno aino vali nelamiya kava huno Goti agi'ale'mo ali'a asaga hisaya kava'e'mo mago'e mago'e huno afole aigiye. 13 Lapakaemo hapa maetapa apamitetapa, Kalaisife'mo alagepa faigoko ge'ae'mo lagesa afita fatago nehune, hutapa alita apave lisage'a agete'apae'mo, he lama gemo nehae, Kolitiyani vaya'mogimo Goti ge'amo akame nehu'a lagae'e muki vaya'e'mo magoke agufa apaipa apakesafati'mo afalu afalugana kava'mo nehae, hu'a hute'a Goti agi'ale'mo ali'a asaga hu'a ategae. 14 Goti'a lusi kava huno fiku lapa maeno lapami'niya'mofe'mo lapakaefe'mo hapau apayamopafi'mo hapau'ninage'a nunumu hu'a lapategae. 15 Goti'a lusi kava huno fiku laha maeno lami'niya kavatefe'mo haita ohapai'neta lavaya'aletike'mo afa gemo osuguna'monanafa Gotifeke'mo hao ke hegetao.